Guddiga Doorashooyinka Guddoonka Baarlamaanka iyo Madaxweynaha oo la magacaabay (Dhegeyso)

Xildhibaanada Baarlamaanka dowladda Soomaaliya oo Maanta markale kulan ku yeeshay Magaalada Muqdisho ayaa waxa ay magacaabeen guddi ka shaqeyn doona doorashada gudoonka Baarlamaanka dowladda Soomaaliya.

Guddiga ay magacaabeen xildhibaanada ayaa ka kooban 15 xubnood, waxaana lagu qeybsaday Nidaamka ay Soomaalidu wax ku qeybsato ee 4.5.

HOOS KA DHEGEYSO

Baarlamaanka oo diiday miisaaniyad xukuumadda u gudbisay

Kalfadhiga Koowaad Kulankiisa Labaad ee Wadajir labada Aqal ee Baarlamaanka Federaalka Soomaaliya oo ay Maanta ku yeesheen Xarunta Golaha Shacabka ee Muqdisho ayaa waxa ay kaga hadleyn arrimo dhowr ah.

Xildhibaannada Baarlamaanka ayaa ka dooday miisaaniyad ay xukuumadda u soo gudbisay, taasi oo ay xildhibaannada qaarkood ku fasireen mid hoos-gelis ah oo la doonayo in hantida dalka lagu dhaco.

Xildhibaanada Baarlamaanka  oo si kulul uga dooday miisaaniyadda xukuumadda ayaa waxay dib u celiyeen Miisaaniyadda Saddexda bilood ee Janaayo, Fabraayo iyo Maarso oo ay soo Gudbisay Wasaarada Maaliyada Soomaaliya. Xildhibaanada ayaa sheegay in aysan sharci ahayn Miisaaniyada loo soo gudbiyay.

135 ka mid ah Xildhibaanadii soo xaadiray ayaa diiday in la ansixiyo Miisaaniyada Saddex bilood ee Janaayo, Fabraayo iyo Maarso oo ay soo Gudbisay Wasaarada Maaliyada Soomaaliya sida uu ku dhawaaqay Guddoomiyaha KMG ee Golaha Shacabka Cusmaan Cilmi Boqore.

Ugu dambeyn Xildhibaanada Baarlamaanka ayaa Maalinta berito ah ku ballamay in ay ka doodaan talooyina ay ku darsadaan dhisidda Guddiga doorashada Guddoonka Baarlamaanka iyo Madaxweynaha.

Duqa Muqdisho oo calaancal ku raadinaya xuquuqdii G/Banaadir (Dhegeyso)

Gudoomiyaha Gobolka Banaadir Sheekh Yuusuf Xuseen Jimcaale oo maanta warbaahinta kula hadlay xarunta Dowladda Hoose ayaa si kulul uga hadlay in Magaalada Muqdisho laga qadiyo qeybsiga Aqalka Sare.

Sheekh Yuusuf Xuseen Jimcaale ayaa soo hadal qaaday hadii tirada xubnaha Aqalka Sare lagu kordhiyay tiro hor leh muhiimada in ay aheyd in Magaalada Muqdisho la siiyo sadkii ay ku laheyd, waxaana uu tilmaamay xubnaha Madasha Qaran in ay uga fadhiyaan in ay cadeeyaan xuquuqda Gobolka Banaadir.

HOOS KA DHEGEYSO

Midowga Yurub oo xafiis ka furanaya Muqdisho (Dhegeyso)

Kulan ku dhexmaray Wasaaradda Qorsheynta iyo Iskaashiga Caalamiga ah ee Dowladda Federaalka Soomaaliya iyo Maamulka Gobolka Banaadir ayaa waxaa looga hadlay xafiis Midowga Yurub uu ka furanayo Magaalada Muqdisho.

Xafiiska Midowga Yurub uu ka furanayo Magaalada Muqdisho ayaa waxaa lagu hormarinayaa Mashaariicda uu ka fulinaayo Magaalada Muqdisho.

Agaasime ku xigeenka Wasaaradda Qorsheynta iyo Iskaashiga Caalamiga ah ee Dowladda Federaalka Soomaaliya Maxamed Daahir Faarax oo markii uu kulanka soo idlaaday warbaahinta la hadlay ayaa waxa uu sheegay Mashruucan in uu yahay mid horey looga soo fuliyay Maamulada Galmudug iyo Koonfur Galbeed.

HOOS KA DHEGEYSO

 

Jen. Muungaab: “Dalka wuxuu u baahan yahay in hoggaanka sare isbeddel lagu sammeeyo” (Dhegeyso)

Wasiiru dowlaha Wasaarada Cadaaladda dowladda Soomaaliya Jen. Xasan maxamed Xuseen (Mungaab) ayaa sheegay in dalka uu u baahan yahay isbeddel ku saleysan hoggaanka sare ee dalka.

Mungaab ayaa sheegay in koox ay dalka qabsatay ,islamarkaana sanadihii lasoo dhaafay uusan gaarin dalka horumar la taaban karo. Sidoo kale wuxuu xusay in dalka uu ku jiro marxalad kala guur ah iyo firaaq dastuuri ah bacdamaa waqtigii dowladda uu dhammaaday bishii September ee aynu kasoo gudubnay.

Wasiiru dowlaha Wasaarada Cadaaladda ayaa sidoo kale sheegay in hadda ay jiraan Musharaxiin u taagan qabashada xilka Madaxtinimada Soomaaliya, kuwaa soo uu sheegay in ay u badan tahay in ay bedelaan hoggaanka ugu sarreeya dalka.

HOOS KA DHEGEYSO